齋戒的第4天 – 31/10/2013

腦裡還是大頭仔的回憶, 不過喜多過悲~~也沒咁易流淚了, 是流乾了嗎??

這3 天還是坐巴士回家, 因為已很攰, 沒精神, 需要在巴士上昏迷一陣~

今晚相公煮了剩下的油麥菜, 芋絲, 粉絲, 素雞片~~

用紫菜包著飯吃是我們這幾天的指定動作~好味道喔~~

齋戒的第3天 – 30/10/2013

時好時壞的心情同情緒, 真的怕會嚇親身邊的人~~唉….

突然今日想吃芽菜仔炒銀針粉, 很可惜去到街市已經無銀針粉賣~~

最後決定雜菜雜菌煲~~有油麥菜, 芋絲, 素菇丸, 生根, 雜菇~~

原來素食亦都可以好好味~~

不過千両SEND MESSAGE 黎話11月至12月食夠1000蚊先續到會~~OMG~~

唯有去千両狂食腐皮SUSHI 啦~!!

齋戒的第二天 – 29/10/2013

哭壞了, 眼很腫, 頭很痛, 沒精神工作, 請了病假~~

哭著睡著到11點幾, 起身食過蔬菜餅, 煮了個芝士面吃~~~

整理回旅行的手信及衣物, 看了一陣獎門人~~

之後,約了姐姐到市中心比手信她~~大家見面沒提起大頭仔, 有講有笑的去了食tea

姐姐知道我齋戒, 教我煮齋麻婆豆腐~ 用玉子豆腐, 齋素雞粒, 豆辦醬, 花生醬煮成~

易煮之餘仲好好味~~姐姐還教我煮南北杏甘荀雪梨水, 夠清甜~~

臨走時, 姐姐話如我放假要搵人陪, 就call佢～～

我明白她的意思, 大家亦都未敢觸碰那個傷口, 因為實在太痛~~

同姐姐見了面後, 心情輕鬆左少少~~

致我摯愛的家人 - 潘大頭

還記得十一年前，第一次見到被哥哥棒在掌心的你，你那呆呆笨笨的樣子，像只小牛

"大頭"這個名字, 是爸爸改的~~因為你細個果陣, 頭仔大大身又少~~

你第一次係屋企行走，就係見到大姐姐伸直對腳坐係地下，你就一仆一碌咁爬上姐姐大比瞓覺

你很怕凍，又怕孤獨～哥哥星期六番左工之後，你就用你尖尖的聲線，喋喋不休的叫一個唔洗番學既我起床幫你換暖水袋

當然我這個臭皮氣的姐姐，沒幫你換暖水袋不特止，還罵你一頓，而你就好委屈咁叫了一聲就回暖水袋上面瞓覺

記得有次同媽媽年三十晚趕制角仔，八卦仔的你，冒著寒冷，都要走到飯廳陪我地～

我地就係飯枱底，用毛巾，暖水袋整左個臨時竇比你瞓～之後，有一段時間，飯枱底變成了你的第二個竇了。

由細到大，你都好為食，仲記得有次，屋裡只有幾個月大的你和我，又唔知自己狗仔細細，成日狼吞虎讌的吃糧，終於"獲利回套"，嘔番d 糧出黎～

你嘔完後就將自己個頭仔墊住係哥哥的大毛毛公仔拖鞋上，我叫你你又唔應，篤你你又無反應～嚇到我喊住打比媽媽，話你唔郁，死左。。。到阿爸阿媽番黎，你又變回精神為食的你。

最記得有次你"疴金"，原來你偷食左哥哥放係床頭櫃d 毫子，媽媽幫你執便便果陣發現，好彩疴到出黎咋，仲要唔只一次！

又試過食膠袋，明白你唔鐘意無人陪你係屋企，係度發皮氣～但，真係擔心d 膠袋你疴唔到出黎，塞住條腸～

有次仲離譜，咬左粒電話電池落張床度玩，仲燒燶左張床肉，好彩無燒曬全間屋

另一樣你最鐘意就係瞓覺，歲半前你都好鐘意瞓係人大比上，尤其是爸爸的大比

打牌既時候又瞓大比，坐sofa時候見有人又瞓大比

當你開始長大，發覺大比已容納不了你的身軀，你就轉投sofa，哥哥的床

而我張床係最矜貴，因為只有你香噴噴，洗左白白既時候先上得～你一上到我張床，就會係度look 地沙，留氣味～見到我張床d 公仔，你都唔敢掂，只係聞下，因為知我會鬧～

天生你一副牙尖咀利，細個同你玩拋波仔，扯玩具，一定比你咬到手腳都損晒。

到你大個左，識就力同人玩，但d 公仔好易就比你 5分鐘KO 左。所以成日要搵新公仔比你。

當你越來越有力氣，能咬彎狗籠的鐵枝，讓我們不得不放棄狗籠，因為驚叉出來的鐵枝整傷你

之後sofa,哥哥的床就係你個竇，當哥哥起身去洗手間，番黎個位多數無左，

因為你會好似人仔咁，用個頭度係枕頭度瞓覺。哥哥要慢慢推開你，先有位再瞓。

你瞓覺時有個習慣，一路抱住隻公仔，一路"妹"住隻公仔，跟住對眼就慢慢咪埋，成個bb仔咁，好得意

每次番屋企，當你聽到鎖匙聲，你都會吠一下，然後走去門口接人

我地都習慣左，一入門口都叫你一聲"大頭"，等你黎迎接

每次我地番黎呢，你首先會扭曬pat pat咁迎接我地

不過你好鐘意係無人在家時搗蛋，咬膠袋，咬爛野到周圍都係

當東窗事發後，你就又爬又"爛"咁挨埋牆，跟住反肚

見到你咁，唔知好笑定好嬲，我地多數打下你大比仔就算～

最激果次，你咬爛我隻魔戒Vcd, 爸媽都維護你，嬲到我衝左落街，冷靜下～

講開落街，當你聽到"落街街"，"食食"呢兩句說話，你就會豎起耳仔，用大大隻欖型眼望住人，人地去邊你跟到去邊～

果陣我就最鐘意欺負你，每次媽媽帶你落街街散步前，都會先去洗手間

而你就會好乖咁係廁所門口，坐到靚靚仔仔等媽媽出黎，呢個時候我就作狀驅趕你，唔比你係門口等，你就會發出d可憐小狗的聲音，我就會好滿意咁走開

當媽媽出黎時，你就好神氣咁跟係媽媽後面，準備落街街～

果陣時既我，對你係最衰果個，最嚴柯

當我地係食飯枱食飯時，你習慣會坐到靚靚仔咁"乞食"，又唔知自己個口大，成日流d "鬼口水"出黎，見無人理你就係度bit眼水扮可憐，次次見到你依d行為，我都會駡你，唔比你埋枱邊，而你就會死死地氣咁走番客廳度～

其實當我地食完飯，總會留幾舊雞或魚或菜比你，你知道嗎？

哥哥結婚前，屋企裝修，落左樓下住，掉左你個狗廁所，你就開始攞正牌落街去大小便，開心死你～

你一向皮膚比較差，番到新屋後問題更嚴重，夏天既"釘瘡"更利害，媽媽買椰子油比你搽身，成身椰子味，香噴噴的大頭，好彩過左一排就好番

姐姐最鐘意"甩"你d 毛，睇下有冇瘡瘡，試過一次摩摩下你下巴既白色毛，點解摩到粒硬既野，開頭以為係損左結焦，但睇真d,點解粒黑卒卒既野識郁，有腳既！

我連環大嗌，哥哥既刻用紙巾mit左隻牛痺出黎，好彩發現得早，如果唔係就好似gulu咁，發燒感染，情況可大可少

講開gulu，係嫂嫂娘家的狗，金毛身型，亦係大頭既好朋友～每逢屋企人去旅行，大頭都會去gulu 屋企渡假～

兩隻狗最鐘意夜媽媽係度玩，玩到顛，撞牆撞櫃，玩左成個星期，番到屋企你就要大昏迷好幾日先回復正常，好似小學生去畢業宿營，同朋友玩到天光，番到屋企就散晒咁

逢親去gulu度，你都坐wen 仔，所以你會好雀躍上車。相反，上的士時你就會好驚，震晒咁，因為多數要去看醫生。

你係一隻細膽的大頭，聽到哥哥大聲d 講野，你就會驚到縮埋一邊～

記得有次有隻昆蟲飛左入黎，哥哥同媽媽好緊張咁，又嗌，又郁手郁腳咁捉昆蟲

當我地捉完蟲之後，先發現你躲左入爸爸房係咁震

自始，有小昆蟲入侵，你就第一時間躲入房間，到我地搵完蟲，就係搵你

可能你覺得我地係度大叫大嚷嚇親你或者係鬧你

但係每次有小昆蟲入侵，我地第一時間諗起你，緊張你比小昆蟲攻擊

哥哥結婚了，之後嫂嫂又有左，你就無得去哥哥床瞓，反而痴我多少少

有時，我坐係電腦枱溫書，你就靜靜地扒係我床邊瞓覺

到楠楠出世，我明白你一定感到被忽略，所以對你特別關愛多d

認識到邦哥哥，又多了個愛錫你的人，帶你去狗公園玩，行石春路，行夜街

依兩年黎，一次比一次大既手術，令你沒以前那麼活潑，像一隻垂垂老矣的狗，沒生氣

還好的是，食食，去街街的時候，變由真正的神氣大頭

當姐姐我出嫁後，你幾天都睡在我的床上，是因為知道姐姐不回來了嗎？

兩次既手術，令你很不舒服了吧，咬牆，咬媽媽，這不是你性格呀！

見你一日比一日消瘦，個心真的很難受，甚至有點想逃避，唔想見你咁樣

我曾有一自私的諗法，希望你早些解脫，不再受這些苦。。

但沒想過離別這麼突如其來～

我在的士上嚎哭你知道嗎？腦裡全是你，為何唔等埋我，連最後一面都見唔到。。

這十一年的相處，有喜有悲，有笑有鬧～我們沒枉過，是嗎？

人的記憶好脆弱，會因時間轉淡，我唔想忘記你

我要永遠記住記住你的一切，所以我將我與大頭的所有記憶，寫出黎，記錄出黎

我同邦哥哥決定為你守齋三個月，這是我們最後能為你做的。

希望你係另一邊過得快活，不再受肉身的苦

用眼淚去寫以上每一隻字，作為對潘大頭你的思念

讓我在這餘下的人生中，永遠記住你，懷念著你。。。

齋戒的第一天 – 28/10/2013

整天都沒胃口吃東西~~早上吃個包, 買了杯HOJICHA LATTE~~下午就沒吃過東西了~

晚上回到家, 老公買了西蘭花, 煮了烏冬~~

甜甜的西蘭花又想起大頭仔乞乞乞個樣, 又喊左陣先食得落野~~